Xotramu organiza este sábado unha xornada dedicada á tradición oral
A Igrexa Vella de Muimenta acollerá este sábado 29 de novembro unha tarde dedicada á música, á tradición e á convivencia, nun programa organizado por Xotramu e dirixido a todos os públicos. A partir das 20.00 horas, o público poderá participar nun obradoiro de tradición oral impartido por Branca Villares, unha proposta que combina ritmo, voz e a esencia da música popular galega.
A xornada completarase coa inauguración da exposición Cantareiras e Cantares – Un ano en cantigas, unha mostra chea de cor, historia e expresividade que pon en valor a cultura musical galega. Ademais, os asistentes poderán gozar de castañas asadas, música en directo e bailes tradicionais, nun ambiente de celebración propio do outono.
A actividade é de balde e aberta a toda a veciñanza, convidada a compartir unha tarde marcada pola tradición, a alegría e o espírito comunitario.