Xoves na Biblio arranca a edición de febreiro con Pablísimo
A Biblioteca Municipal continuará durante o mes de febreiro co programa Xoves na Biblio, cunha variada oferta de actividades culturais dirixidas ao público infantil e familiar. As propostas combinarán contacontos, obradoiros creativos e espectáculos musicais, sempre en horario de tarde, ás 18.00 horas, e con inscrición previa na biblioteca.
A programación comezará o xoves 5 coa actividade Mans, do artista Pablísimo, dirixida a nenos e nenas a partir de 3 anos e que terá lugar na Casa Dopeso. O xoves 12 será a quenda do obradoiro creativo Debuxando caras, impartido por Silvia Rábade, unha proposta pensada para público infantil a partir de 5 anos que se desenvolverá na Biblioteca Municipal.
O xoves 19 chegará á Casa Dopeso a actividade 3 irmás, 3 camiños e 3 grandes perigos, a cargo de Paula Carballeira, dirixida a crianzas a partir de 4 anos, cunha sesión de narración pensada para estimular a imaxinación e o gusto pola lectura. Pechará o ciclo o xoves 26 o espectáculo A banda no rock, con Cris Collazo e o Conservatorio de Música das Pontes, unha proposta musical para público familiar que se celebrará no Auditorio Alovi.
Esta iniciativa, organizada pola Biblioteca Municipal co apoio do Concello das Pontes e da Rede Cultural da Deputación da Coruña, busca fomentar o hábito lector, a creatividade e o achegamento á cultura desde idades temperás, convertendo os xoves nun punto de encontro cultural para as familias do municipio.