Xunta e Concello de Outeiro de Rei avanzan no proxecto de construír unha nova EDAR
![reunion-conselleira-alcalde-outeiro-de-rei-edar](https://terrachaxa.com/wp-content/uploads/2024/08/reunion-conselleira-alcalde-outeiro-de-rei-edar.jpg)
A Xunta de Galicia e o Concello de Outeiro de Rei seguen avanzando no proxecto para construír unha nova estación depuradora de augas residuais (EDAR) no municipio para mellorar o servizo que se presta á veciñanza.
Así, nunha reunión que mantiveron hoxe, a conselleira de Medio Ambiente e Cambio Climático, Ángeles Vázquez, comunicoulle ao alcalde da localidade, José Prado, que está previsto que Augas de Galicia adxudique nas vindeiras semanas o contrato para o servizo de redacción do proxecto construtivo da nova EDAR, cun orzamento inicial estimado de máis de 240.000 euros.
Cómpre indicar que ese contrato inclúe tamén a mellora dos colectores xerais co obxectivo de dar solución ao problema das infiltracións de augas limpas na rede de saneamento municipal.
Segundo subliñou Ángeles Vázquez, a Xunta continuará prestando o seu apoio técnico e económico aos concellos para que poidan exercer as súas competencias de saneamento e abastecemento de xeito máis eficiente e prestar servizos de calidade á súa veciñanza.