Billardeiros Musicais gaña na última xornada de billarda

Desta volta non foi o frío nin a neve, un fallo no sistema de comunicación levaron a LNB ao pavillón deportivo de Trabada para disputar a terceira xornada da tempada billardeira. Unha mágoa xa que o día inmellorable convidaba a xogar fóra.

Xornada moi áxil e disputada e xa dende o comezo (facilitado polo esbaradizo do chan) foron moitos os tiros directos que superaron o varal, uns por dentro, para ledicia dos venturosos, e outros por fóra, para fastidio dos malfadados palanadores.

Subliñar que seguindo o acordo tomado a principios de tempada, xogando en pavillón, só se consideran varado os tiros directos que crucen a liña de varal sin tocar no chan e daquela, aínda que foron moitos os que entraron no primeiro golpe, só un perfecto golpe de Chousa lle permitiu acadar o primeiro e único varado da tempada.

Van pasando as carreiras e a falta da derradeira, a Daniel e Markytos con dezanove puntos só os superaba Charli con vinte, polo que o carabullo, seguindo na súa liña semellaba telo doado, mais non foi o caso, unha cativa saída e un erro no segundo golpe, estragaron a súa oportunidade facendo so tres puntos e como os dous músicos billardeiros fixeron cadan seus catro remataron os tres empatados a vintetrés puntos.

Desempate a tres carreiras que deixou este podio: Daniel, Markytos, Charli.

En equipos, os Billardeiros Musicais tiveron a tarde e deron o do de peito acadando unha das puntuacións máis altas dende que se usa esta modalidade de puntuación (90 puntos sobre cen, só superada por este mismo equipo nas tempadas 2015-16 e 2016-17), Chainzos-Cadaval e Carbullo completaron o podio con 84 e 83 puntos.

En donas, nesta xornada en xeral de boas puntuación para casi todas elas, destacaron Sandra, Paula e Vivi. A ausencia da intratable Geni relegouna ao terceiro posto da xeral xa que tanto Paula como Dori aproveitaron para adiantala e poñerse ao mando na táboa de donas.

Os infantís van entrando en xogo e participando cada vez en maior número. Destacaron Marcos, Mateu e Aroa e amosaron boas maneiras Iker e Maré.

Suso Villarino fixo os honores entregando uns saquetos de castañas aos gañadores e así rematou esta terceira xornada da LNB.

As clasifiacións quedan asi:

Individual: 

Markytos (Billardeiros Musicais)                          64 p.
Pepe Outeiro (Chainzos-Cadaval)                     61 p.
Regueiro (Troitas Bravas)                                     60 p.
Manu Pozo (Billardeiros Musicias)                     57 p.
Sachas (Troitas Bravas)                                        56 p.

Donas:

Paula (Chainzos-Cadaval)                                               33 p.
Dori   (Billardeiros Musicais)                                30 p.
Geni  (Billardeiros Musicais)                                28 p.

Equipos:

Chainzos-Cadaval (Castro de Rei)                     232 p.
Billardeiros Musicais (Ribadeo)                          230 p.
Troitas Bravas (A Ponteneova)                            218 p.

A próxima cita coa billarda será en San Miguel o sábado 16 de novembro.

Etiquetas