A Asociación Cultural e Deportiva de Árbol presenta a súa oferta de cursos para o curso actual
A Asociación Cultural e Deportiva de Árbol, en Vilalba, pon en marcha a súa programación de actividades para o curso 2026/2027, cunha oferta que combina exercicio físico, formación, cultura e lecer para diferentes públicos.
A programación inclúe clases de zumba, adestramento saudable para maiores, costura, música, pilates e teatro, co obxectivo de dar continuidade ás actividades desenvolvidas o pasado ano e incorporar novas propostas para a veciñanza.
As clases de zumba celebraranse os martes, de 22.00 a 23.00 horas, a partir do 6 de outubro. O adestramento saudable para maiores, denominado Danju, terá lugar os mércores, de 11.30 a 12.30 horas, desde o 14 de outubro. Pola súa banda, o curso de costura desenvolverase os mércores, de 16.30 a 18.30 horas, a partir do 7 de outubro, mentres que as clases de música comezarán ese mesmo día ás 20.30 horas.
A oferta complétase coas sesións de pilates, que se impartirán os xoves, de 15.30 a 16.30 horas, desde o 8 de outubro, e coas clases de teatro, programadas para os venres a partir das 21.30 horas, desde o 9 de outubro.
As tarifas mensuais varían segundo a actividade e a condición das persoas participantes. Para os socios, os prezos oscilan entre os 20 e os 30 euros ao mes, mentares que para os non socios sitúanse entre os 30 e os 40 euros. A organización establece un mínimo de dez persoas por curso e os pagos realizaranse mensualmente. Para obter máis información ou inscribirse, poden contactar con Óscar no 660 684 279, Tamara no 627 395 122, Patricia no 680 442 531 ou Marisol no 675 987 412.
Con esta iniciativa, a Asociación Cultural e Deportiva de Árbol busca fomentar a participación veciñal e ofrecer alternativas de actividade física, aprendizaxe e dinamización cultural ao longo do novo curso.