A Asociación de Veciños Santiago de Sancovade organiza cursos de costura e bolillos
A Asociación de Veciños Santiago de Sancovade pon en marcha este mes dous cursos formativos centrados na costura e nos bolillos, dirixidos ás persoas interesadas en iniciarse ou ampliar os seus coñecementos nestas técnicas artesanais.
O primeiro curso será o de costura, que dará comezo o domingo 18 de outubro. As sesións desenvolveranse os domingos, en horario de 10.30 a 12.30 horas. O prezo é de 22 euros para as persoas socias e de 27 euros para as non socias, cunha tarifa establecida para grupos de dez persoas.
O día seguinte, luns 19 de outubro, comezará o curso de bolillos, que se desenvolverá os luns de 17.00 a 19.00 horas. Neste caso, o custo será de 24 euros para as persoas socias e de 30 euros para as non socias, tamén cun prezo calculado para grupos de dez participantes.
As persoas interesadas en participar poden solicitar información ou formalizar a inscrición a través dos teléfonos de contacto de Almudena, no 698 185 859, e Lucía, no 651 478 916.