A Banda de Música de Vilalba ofrecerá un concerto especial no Centro Cultural e Recreativo
A Banda de Música de Vilalba actuará este 9 de maio ás 20.00 horas no Centro Cultural e Recreativo de Vilalba nun concerto incluído dentro da programación cultural Tradigalu, centrada na música tradicional, bandas e corais.
O evento será de acceso libre e gratuíto e pretende converterse nunha cita destacada para os amantes da música e da cultura local. Dende a organización animan á veciñanza a asistir a unha velada “chea de emocións, boa música e talento local”.
A actuación conta co apoio da Vicepresidencia da Deputación de Lugo a través da área de Cultura e forma parte das actividades impulsadas para promover e difundir a música en directo no municipio.
O concerto celebrarase nas instalacións do Centro Cultural e Recreativo de Vilalba e reunirá ao público arredor dun repertorio preparado especialmente para esta ocasión pola formación musical vilalbesa.