A Biblioteca Rivera Rouco das Pontes acollerá tres presentacións de libros entre setembro e outubro
A Biblioteca Municipal Enrique Rivera Rouco das Pontes acollerá entre os meses de setembro e outubro tres presentacións de libros que achegarán ao público diferentes xéneros e temáticas. As citas desenvolveranse ás 20.00 horas e estarán protagonizadas por María Timiraos, Manuel Monge e Anxo Vidal.
A primeira presentación terá lugar este xoves, 17 de setembro, e estará dedicada á obra No me rompí del todo: las partes que quedaron en silencio, de María Timiraos, un libro encadrado no xénero da superación persoal.
O 25 de setembro será a quenda de Manuel Monge, que presentará Usted debería saber. La historia secuestrada de la monarquía. 90 años con Franco, unha obra de ensaio centrada na historia da monarquía e no período franquista.
O ciclo pecharase o 2 de outubro coa presentación de O xigante das Pontes: o fin dunha era: escombros con nome de muller, de Anxo Vidal Rivas, unha obra de ficción vinculada á historia das Pontes.
As tres actividades terán como escenario a Biblioteca Municipal Enrique Rivera Rouco das Pontes, dentro da programación cultural impulsada polo Concello e a propia biblioteca.