A Casa do Mel de Goente convoca as Xornadas Apícolas do Eume na Feira do Mel
As Pontes converterase de novo no epicentro da apicultura galega coa celebración das XXVII Xornadas Apícolas do Eume, que terán lugar o 9 e 10 de outubro na Casa do Mel de Goente, e coa XVI Feira do Queixo e do Mel, prevista para o día 11 na mesma localidade.
A programación abrirase o día 9 ás 16. 00 horas cunha sesión práctica sobre o uso do kit Vespa Finder para a localización de niños de velutina, impartida por Abel Kavanagh, representante de Robor Nature España. Para participar nesta actividade é necesario realizar unha inscrición previa a través do formulario habilitado pola Xunta de Galicia.
O sábado 10 de outubro a programación comezará ás 10.30 horas cunha nova sesión sobre o uso do kit Vespa Finder para a localización de niños de velutina, tamén a cargo de Abel Kavanagh.
Ás 11.30 horas será a quenda da charla sobre a aplicación das axudas públicas na apicultura, impartida por Alejandro Martínez Verez, xefe da sección OAC das Pontes. A continuación, ás 12.00 horas, Umberto Moreno, zootecnista e máster en xenética apícola con máis de 30 anos de experiencia profesional no sector, ofrecerá a conferencia titulada «Xenética apícola: como interpretar o que vemos na colmea».
Tras o xantar, ás 16.00 horas, Iria Bellas, veterinaria da Casa do Mel, abordará as novidades en sanidade apícola e os cambios normativos no sector. Ás 16.30 horas presentaranse os resultados do Plan Apícola 2025 2026 e os resultados do Grupo Operativo Panega, nunha intervención a cargo de Iago Vilela, técnico da Casa do Mel.
A programación continuará ás 17.00 horas coa charla «A Casa do Mel como entidade de asesoramento: axudas e subvencións para o sector apícola», impartida por Susana Trastoy, enxeñeira técnica agrícola.
Para rematar a xornada, ás 17.30 horas, Umberto Moreno falará sobre a varroa e o seu manexo estratéxico, abordando a problemática desde a bioloxía ata a xestión das colmeas.
As xornadas concluirán o domingo 11 coa celebración da XVI Feira do Queixo e do Mel, que completará un programa dedicado á divulgación e promoción da actividade apícola e dos produtos do sector.
Para obter máis información pódese contactar coa Casa do Mel no teléfono 661 003 616 ou no enderezo electrónico casadomel@vodafone.es. Para participar no xantar do sábado será necesario realizar a inscrición na Casa do Mel hoxe, luns, como último día.