Empresa e industria

O proxecto prevé unha inversión inicial de 200 millóns de euros, a creación de arredor de 2.300 empregos directos e indirectos e unha capacidade produtiva de ata 120.000 vehículos anuais

A chegada do buque portavehículos Anji Forever ao porto exterior de Ferrol marcou este xoves un fito para a economía galega e o inicio visible do desembarco da multinacional chinesa SAIC en Galicia. O barco, procedente de China tras máis dun mes de travesía, descargou arredor de 700 vehículos da marca MG nunha operación que supón o primeiro paso dun proxecto industrial que aspira a converter Ferrolterra e As Pontes nun novo polo estratéxico da automoción europea.

O acto institucional celebrado nas instalacións portuarias reuniu a representantes das principais administracións e do tecido empresarial galego. Entre eles estiveron o presidente da Xunta, Alfonso Rueda; o vicepresidente de SAIC, Wu Bing; o presidente da Deputación da Coruña e alcalde das Pontes, Valentín González Formoso; a conselleira de Economía, María Jesús Lorenzana; o subdelegado do Goberno na Coruña, Julio Abalde; o alcalde de Ferrol, José Manuel Rey Varela; o presidente da Autoridade Portuaria de Ferrol-San Cibrao, José Antonio Álvarez, e o presidente da Confederación de Empresarios de Galicia, Juan Manuel Vieites.

Máis alá da chegada dos vehículos, a operación simboliza o comezo dun investimento estratéxico que contempla a construción da primeira fábrica de coches eléctricos de SAIC en Europa no porto exterior de Ferrol e a creación dun centro loxístico nas Pontes. O proxecto prevé unha inversión inicial de 200 millóns de euros, a creación de arredor de 2.300 empregos directos e indirectos e unha capacidade produtiva de ata 120.000 vehículos anuais, coa previsión de que as instalacións estean operativas antes de finalizar o ano 2028.

O vicepresidente de SAIC, Wu Bing, cualificou a xornada como un momento histórico para Ferrol e destacou que a chegada do primeiro barco representa un “arranque exitoso” da compañía en Galicia. Segundo explicou, a actividade xa está a xerar emprego a través das operacións de descarga, almacenamento e loxística, e asegurou que o crecemento do proxecto permitirá crear máis postos de traballo estables e de calidade. Tamén avanzou que a empresa apostará pola colaboración coas compañías galegas e pola integración no tecido económico da comunidade.

Pola súa banda, o presidente da Xunta, Alfonso Rueda, definiu a chegada do Anji Forever como a primeira imaxe visible dun proxecto industrial de longo percorrido chamado a transformar o futuro de Galicia. Destacou que a elección de Galicia por parte da multinacional chinesa responde á capacidade industrial, á rede de infraestruturas, ao talento profesional e á estabilidade institucional da comunidade. Ademais, subliñou que esta iniciativa permitirá consolidar Galicia como un dos principais polos da automoción en Europa.

Tamén Valentín González Formoso puxo o acento no impacto que terá a implantación de SAIC sobre Ferrolterra e As Pontes. O presidente da Deputación destacou a importancia da colaboración entre administracións para facer realidade un proxecto que, segundo indicou, contribuirá a reforzar a industria auxiliar, a actividade loxística e a creación de emprego nun territorio que afronta desde hai anos o reto da transición industrial e enerxética.

A relevancia das Pontes dentro da iniciativa é especialmente significativa, xa que albergará o centro loxístico da compañía, converténdose nun nodo clave para a distribución dos vehículos e para a futura actividade industrial asociada ao proxecto. A implantación de SAIC supón así unha oportunidade para impulsar a reindustrialización da comarca e abrir novas expectativas económicas tras o peche da central térmica.

O alcalde de Ferrol, José Manuel Rey Varela, asegurou que a cidade inicia unha nova etapa e destacou que, por primeira vez en moito tempo, unha das grandes oportunidades industriais de futuro escolle Ferrol como destino. Nunha liña semellante pronunciouse o presidente da Autoridade Portuaria, José Antonio Álvarez, quen sinalou que a chegada do primeiro barco representa moito máis ca unha operación loxística, xa que certifica a confianza dunha das maiores compañías automobilísticas do mundo nas capacidades do porto e do tecido industrial galego.

O Anji Forever, botado ao mar este mesmo ano, conta con 228 metros de eslora e capacidade para transportar ata 9.500 vehículos. Está preparado para utilizar metanol como combustible alternativo de baixas emisións e forma parte da frota de Anji Logistics, empresa do grupo SAIC que opera 42 buques especializados no transporte de vehículos. A previsión é que Ferrol reciba unha escala mensual deste servizo, reforzando a súa posición nas rutas marítimas internacionais entre Asia e Europa.

Con máis de 4,5 millóns de vehículos vendidos en todo o mundo durante 2025 e máis de 300.000 unidades comercializadas en Europa, SAIC é actualmente o maior fabricante automobilístico de China. A chegada do seu primeiro barco a Ferrol representa o inicio dunha alianza industrial que aspira a converter Ferrolterra e As Pontes nun dos principais centros de referencia da nova mobilidade eléctrica no continente europeo.