A CIG-Ferrol reclama a cesión dos terreos de Endesa e un novo plan para impulsar a reindustrialización das Pontes
A CIG-Ferrol reclama á Xunta de Galicia e a Endesa a posta en marcha dun novo plan de desenvolvemento para As Pontes que permita avanzar na reindustrialización da localidade e aproveitar os terreos e infraestruturas que permanecen sen uso tras o peche da central térmica.
A central sindical considera “inaceptable” que o municipio continúe sen dispoñer de solo industrial para acoller novos proxectos produtivos mentres existen amplas superficies industriais vinculadas a Endesa que se atopan sen actividade ou en proceso de desmantelamento. Para a CIG, a situación económica e laboral da comarca esixe “respostas inmediatas” e a compañía eléctrica ten unha responsabilidade evidente na recuperación industrial do territorio.
Neste contexto, o sindicato reclama a sinatura dun novo plan de desenvolvemento con compromisos concretos por parte da Xunta e de Endesa. Entre as medidas propostas figura a cesión dos terreos, instalacións e infraestruturas industriais da compañía nas Pontes para poñelos á disposición de novos proxectos produtivos. A CIG defende que esta debe ser unha das prioridades das políticas de transición xusta e que a recuperación industrial non pode limitarse á compravenda das instalacións xa existentes.
A organización sindical tamén pon o foco na situación das persoas traballadoras afectadas pola perda de actividade ou polo peche de empresas como EINSA e Galcore. Neste sentido, esixe que calquera novo proxecto que se implante nas instalacións destas compañías garanta o mantemento e a recuperación do emprego, así como a incorporación das persoas traballadoras afectadas, con todos os seus dereitos, ás novas actividades industriais.
Para a CIG, o aproveitamento das instalacións existentes pode facilitar a chegada de novas empresas e a creación de emprego, sempre que o balance final sexa positivo e non se deixe atrás o persoal que sufriu directamente os procesos de destrución de postos de traballo.
O sindicato reclama tamén á Xunta que explique con transparencia que proxectos están previstos para as instalacións de EINSA, que investimentos públicos se están realizando, cales son as condicións das operacións e que garantías de emprego se establecerán. Considera que a información coñecida ata o momento é insuficiente para determinar o futuro dunhas instalacións que poden desempeñar un papel fundamental na reindustrialización das Pontes.
A CIG defende que a transición industrial do municipio debe asentarse no aproveitamento produtivo dos terreos e infraestruturas existentes, na creación de emprego industrial estable e de calidade e na incorporación das persoas traballadoras afectadas polos procesos de destrución de emprego.
Entre as súas principais demandas figura a creación dun novo plan de desenvolvemento para As Pontes, acompañado dunha comisión executiva formada pola Xunta, Endesa e as organizacións sindicais, así como a cesión dos terreos e infraestruturas industriais da compañía eléctrica. Tamén pide que os novos proxectos que ocupen as instalacións de EINSA e Galcore garantan a incorporación e subrogación do persoal afectado.
A central sindical reclama igualmente que a Xunta e Xestur poñan os recursos dispoñibles ao servizo dunha “verdadeira” reindustrialización, evitando operacións sen garantías de creación e mantemento de emprego e ofrecendo información pública sobre as actuacións realizadas e os proxectos previstos.
Finalmente, a CIG esixe que o acceso aos terreos, instalacións e axudas públicas estea condicionado ao cumprimento de compromisos concretos de emprego, investimento e actividade industrial. O sindicato advirte de que As Pontes non pode converterse nun territorio no que se “socialicen as perdas e se privaticen as oportunidades” e insiste en que a transición industrial debe realizarse contando coa clase traballadora e garantindo un futuro produtivo para a comarca.