A Deputación inicia os traballos na Avenida Principal da Pastoriza

TerraChaXa
A Deputación inicia os traballos na Avenida Principal da Pastoriza, onde inviste preto de 350.000 euros na remodelación integral da vía.
OBRAS TRAVESIA PASTORIZA DEPUTACION
OBRAS TRAVESIA PASTORIZA DEPUTACION
17 nov 2022

O proxecto suporá a remodelación integral da vía que discorre polo centro da vila, coa dotación de novas beirarrúas, a rehabilitación do firme, a sinalización e melloras no alumeado público.

A Deputación de Lugo vén de iniciar esta semana os traballos de mellora na avenida Principal do concello da Pastoriza. Trátase dunha obra na que a institución provincial inviste preto de 350.000 euros, que conta cun prazo de execución de 3 meses, e que afecta á estrada provincial LU-P-4401, ao seu paso polo centro da vila, dende o inicio da vía ao punto quilométrico 1,550.

O proxecto suporá a remodelación integral da rúa, coa dotación de novas beirarrúas, a rehabilitación do firme, a instalación de nova sinalización mediante marcas reflexivas brancas e a mellora do alumeado público.

Esta actuación complementa outro proxecto valorado en máis de 300.000 euros, xa en execución, para arranxar o pavimento de preto de 11 quilómetros nesta mesma estrada, que conecta á Pastoriza con Muimenta por Reigosa.

O presidente da Deputación de Lugo, José Tomé Roca, sinalou que a LU-P-4401 é unha estrada cunha importante relevancia social porque atravesa o núcleo da localidade. “É unha vía moi empregada pola veciñanza da Pastoriza, pero tamén pola de Cospeito e Castro de Rei, así como por aqueles que se desprazan pola comarca chairega”, sinalou. Ademais, a vía dá servizo a varias instalacións deportivas, como o polideportivo, as piscinas municipais da Pastoriza e o campo de fútbol do Acebreiro, onde xoga habitualmente o UD Pastoricense.

“A mellora das comunicacións é unha prioridade para este Goberno”, subliñou Tomé Roca, que detalla que a institución provincial defende a mobilidade “como un dereito básico dos veciños e veciñas da provincia, porque unha boa rede de estradas é fundamental para o equilibrio territorial e para o desenvolvemento do rural”. A institución provincial destina 17,3M€ dos seus Orzamentos para o 2022 ás tarefas de mellora do firme, roza de maleza, conservación e mantemento da rede viaria provincial, a máis extensa de todo o Estado e tres veces maior ca da Xunta en Lugo.

A Deputación de Lugo destina este 2022 ao concello da Pastoriza preto de 1,3 millóns de euros a través de diferentes vías de actuación que melloran os servizos e calidade de vida dos veciños e veciñas.