A Deputación presenta catro xovencas de Gayoso Castro no Concurso-Exposición da Fonsagrada
Catro xovencas procedentes da Granxa Gayoso Castro foron presentadas pola Deputación de Lugo no Concurso-Exposición de gando vacún da Fonsagrada, que este ano alcanza a súa 50ª edición. Os animais, de raza Rubia Galega, participaron na poxa organizada por ACRUGA e acadaron un prezo medio de 3.475 euros.
As catro reses tiñan arredor de 25 meses de idade e atopábanse preñadas de entre catro e seis meses. O prezo de saída establecido para os exemplares foi de 2.900 euros, aínda que as ofertas permitiron elevar esa cantidade. Finalmente, unha das xovencas foi adxudicada por 3.500 euros, dúas por 3.600 euros e outra por 3.200 euros.
Os animais foron adquiridos por gandeiros da provincia de Lugo, entre eles criadores de Sarria, O Corgo e A Fonsagrada. A poxa contou con 17 tarxetas de posibles compradores, unha cifra que amosa o interese suscitado pola convocatoria entre os profesionais do sector.
A participación das xovencas de Gayoso Castro integrouse nunha xornada dedicada ao gando vacún e á actividade gandeira, coincidindo coa celebración da quincuaxésima edición do Concurso-Exposición da Fonsagrada. O certame reuniu exemplares de diferentes explotacións e incluíu tamén o correspondente concurso e a entrega de trofeos aos animais premiados.
O deputado de Medio Ambiente e alcalde da Fonsagrada, Carlos López, participou no acto e na entrega dos premios. Durante a xornada tamén estivo presente o presidente da Asociación Nacional de Criadores de Gando Vacún Selecto de Raza Rubia Galega (ACRUGA), César Dorado, xunto con representantes das administracións e do sector gandeiro.
A Granxa Gayoso Castro, situada no concello de Castro de Rei, é unha instalación dependente da Deputación de Lugo na que se desenvolven programas de recría de gando vacún. Os animais presentados nesta ocasión forman parte da colaboración existente entre a institución provincial e ACRUGA neste ámbito.
A poxa da Fonsagrada forma parte ademais do calendario de subastas de xovencas de raza Rubia Galega promovidas por ACRUGA. Tras esta convocatoria, a asociación ten previstas novas citas o 10 de setembro en Castro Caldelas e o 20 de setembro en Pedrafita do Cebreiro.