A Escola de Pino acollerá un curso de cerámica en novembro e decembro
A Asociación Cultural de San Martiño de Pino, de Cospeito, organiza un curso de cerámica que será impartido por M.ª José Sánchez Castedo e que se desenvolverá durante os meses de novembro e decembro no local social da Escola de Pino.
A actividade terá lugar seis sábados, concretamente os días 14, 21 e 28 de novembro e 5, 12 e 19 de decembro, en horario de 16.00 a 20.00 horas. O curso é gratuíto, aínda que os materiais necesarios para a realización das pezas correrán a cargo das persoas participantes.
As prazas son limitadas, cun máximo de 12 persoas, polo que a organización establecerá unha orde de prioridade para a súa adxudicación. En primeiro lugar, terá preferencia unha persoa socia por carné; en segundo lugar, o resto de socios e socias do mesmo carné e, finalmente, as persoas non socias. Esta distribución busca garantir un reparto o máis xusto posible das prazas dispoñibles.
A iniciativa está organizada pola Asociación Cultural de San Martiño de Pino, coa colaboración da Deputación de Lugo e do Centro de Artesanía e Deseño (CENTRAD), e pretende achegar a cerámica á veciñanza a través dunha proposta formativa e creativa.