A Escola Municipal de Música de Guitiriz celebrará as audicións de fin de curso a partir do luns
A Escola Municipal de Música de Guitiriz celebrará a próxima semana as tradicionais audicións de fin de curso, unha actividade coa que o alumnado terá a oportunidade de amosar o traballo realizado ao longo do ano académico diante das familias, amizades e veciñanza.
As actuacións desenvolveranse nas instalacións da Escola de Música, ubicadas na nave do Sempa, e contan coa colaboración da asociación Mubagui, da área de Igualdade e do Concello de Guitiriz.
A programación dará comezo o luns 8 de xuño ás 19.00 horas coa audición das especialidades de vento metal e vento madeira. O xoves 11 de xuño continuará a actividade cunha sesión dedicada ao piano e á percusión, prevista para as 19.00 horas, seguida dunha nova audición de vento madeira ás 19.30 horas.
As actuacións concluirán o venres 12 de xuño ás 19.30 horas coa audición do alumnado de guitarra, que será a encargada de pechar esta edición das mostras musicais de final de curso.
Estas audicións constitúen unha das citas máis destacadas do calendario anual da escola, xa que permiten ao alumnado poñer en práctica os coñecementos adquiridos durante o curso e compartir co público a súa evolución musical. Ademais, serven para achegar a actividade formativa do centro á veciñanza e poñer en valor o traballo desenvolvido tanto polo profesorado como polos estudantes ao longo do ano.