A IV Volta á Terra Chá Clásica reuniu afeccionados ao ciclismo clásico en Santaballa
Este mes celebrouse a cuarta edición da Volta ciclista á Terra Chá en bicicleta clásica, un evento organizado por Biciclistas Galegos que reuniu afeccionados chegados de diferentes puntos de Galicia e do resto de España.
A proba arrancou desde a Feira Indiana de Santaballa e contou coa participación de ciclistas procedentes de León, Madrid, Palencia, Segovia, Bilbao, Asturias, Ourense, Vigo e doutras localidades da contorna.
Os participantes, vestidos con roupa clásica e montados en bicicletas de época, percorreron os 70 quilómetros do trazado acompañados por unha caravana sonora. O paso do pelotón chamou a atención dos veciños de Santaballa, Cospeito e Abadín, localidades por onde discorreu a ruta.
Esta foi a cuarta edición dunha proba que se está a consolidar como un referente para os afeccionados ao ciclismo clásico en Galicia.
Un dos grandes protagonistas desta edición foi o excorredor profesional Iñaki Gastón Crespo, que militou en equipos míticos como Reynolds, Kelme, Mapei e Kas. O ciclista vasco conseguiu importantes resultados ao longo da súa carreira, entre eles tres vitorias de etapa na Volta a España nos anos 1987 e 1988 e o premio da montaña do Giro de Italia en 1991.
Gastón destacou a hospitalidade e o ambiente da proba, así como a celebración da Feira Indiana de Santaballa, onde tivo lugar o xantar e a entrega de agasallos aos participantes.
No pelotón tamén estiveron presentes ciclistas de diferentes clubs da comarca e excorredores afeccionados, entre eles o vilalbés José Luis Arias Fuentes.