Rural

A veciña Paula Francos Anllo volveu realizar o deseño dos carteis da feira exposición e do Concurso de Gando Frisón

A comisión organizadora da XLII edición da Mostra Exposición de Muimenta – Moexmu continúa coas súas reunións de traballo.

Paula Francos Anllo volveu realizar o deseño dos carteis da propia feira Moexmu e do Concurso de Gando Frisón, que se celebrarán os días 10, 11 e 12 de abril.

Os carteis desta edición tan especial para todos e todas recollen a gran festa do agro galego, á que toda a xente está convidada.

Coma nos últimos, os dous carteis manteñen a mesma liña, coherencia e discurso gráficos
para que sexa doado asocialos entre si.

Nun deles, unha muller “forzuda” que carga cos elementos do rural: simbolizando o papel esencial da muller no noso campo e no noso rural, e dun xeito máis amplo, transmitindo á mensaxe de que o noso rural está cheo de forza para seguir construíndo o noso futuro.

No segundo, unha vaca, proclamada gañadora do concurso de gando, aparece cargando obxectos que, ademais de estar relacionados do premio, resaltan o valor do coidado e a experiencia para acadalos: a boa alimentación (cereais), a gandería extensiva ao aire libre (sol), ademais do mimo e o agarimo animal (co peite e o secador) son pezas protagonistas do mesmo.

Como toque especial, a gañadora, leva un colgante coa forma do noso país: Galicia, lembrando e recalcando que a Moexmu acolle o XXXIV Concurso Autonómico de Gando Frisón de Galicia, xunto ao XL Concurso e Exposición de Gando e a XXX Poxa de Gando Selecto.