A Ruta BTT Terra Chá San Simón da Costa percorrerá o 5 de abril tres concellos
O sábado 5 de abril, volverá celebrarse a Ruta BTT do Club Ciclista Terra Chá, a que será a novena edición, coincidindo coa celebración da Feira do Queixo San Simón da Costa.
Para este 2025 a organización ten preparadas tres distancias e niveis de dificultade de 72, 55 e 40 quilómetros que percorrerán os concellos de Vilalba, Muras e Xermade. O máis curto é o único apto para bicicleta gravel. Os desniveis serán de 2000 metros na primeira ruta 1.400 na segunda e 700 na terceira.
Este ano sairase ás 9:00 horas desde a Praza da Constitución, en plena feira, cara á Mourence, pola contorna do río Madalena, pasando por Pena Grande, con puntos de percorrido como Lousada, o batán de Folgoso, Irixoa, A Balsa e de volta por Vilapedre e San Simón.
Aqueles que participen contarán con abundantes avituallamentos, servizo médico e servizo de asistencia mecánica en ruta. Rematarán cuns pinchos para os participantes no lugar da meta.
Haberá un agasallo para o primeiro, segundo e terceiro participante da categoría masculina na distancia longa e para a primeira, segunda e terceira participante da categoría feminina na distancia longa, polo que terán que acreditar ter realizado todo o percorrido mediante Strava. Tamen haberá agasallo para o club máis numeroso e para o participante de maior idade. Entre eles hai mel de Muras e queixo de San Simón.
As inscricións xa están abertas en CCnorte.com ata o 1 de abril. O prezo é de 25 euros e as prazas están limitadas a 300 persoas maiores de 15 anos e xa están preto de acadar o límite.
O acto de presentación do evento, que tivo lugar na Casa de Cultura de Vilalba, contou coa presenza da alcaldesa da capital chairega, Marta Rouco; o concelleiro de Xermade, José Prieto Barro; o alcalde de Muras, Manuel Requeixo; o deputado de Promoción Económica e Social, Pablo Rivera Capón, e o organizador da proba e presidente do Club Ciclista Terra Chá, José Carreira.
Os alcaldes e o concelleiro presentes defenderon este evento como "probas que cohesionan o territorio, dinamizan a vida dos concellos e póñenos no mapa".