A secretaria de Estado visita As Pontes para coñecer o futuro da planta de hidróxeno verde
O alcalde das Pontes, Valentín González Formoso, acompañado polo delegado do Goberno en Galicia, José Miñones, mantiveron un encontro coa Secretaria de Estado de Enerxía, Sara Aagesen e representantes de Reganosa e EDP para falar sobre a planta de hidróxeno verde que ambas compañías proxectan nas Pontes así como sobre a concesión dunha axuda de 24 millóns de euros, procedentes de Fondos Europeos para a súa posta en marcha.
González Formoso, ao remate do encontro, agradeceu á Secretaria de Estado de Enerxía a súa presenza e dispoñibilidade, amosando sempre o seu compromiso con As Pontes “un pobo que é unha referencia enerxética dun modelo baseado no carbón, actualmente en transición, pero tamén dun modelo xerador de enerxía a través do gas natural, da auga e do vento, que non lle ten nada que envexar aos grandes polos europeos de produción enerxética”
“Faltábanos outro elemento, o almacenamento enerxético, que ten forma de hidróxeno. É a gran aposta do goberno e sobre a que a comarca de Ferrolterra vai a ter moito protagonismo, tanto na fabricación de compoñentes como na xeración e almacenamento de enerxía como na súa comercialización, no só na localidade e na súa contorna senón tamén a nivel internacional. Temos que ser hábiles e áxiles para acompañar esa estratexia do Goberno de España para que se materialice en proxectos como o de Reganosa e EDP Renovables” engadiu González Formoso.
Así mesmo o rexedor local agradeceu ao Ministerio de Transición Ecolóxica e Reto Demográfico o seu respaldo ao proxecto da planta de hidróxeno verde das Pontes, cun apoio económico de 24 millóns de euros, a través de dúas liñas, e que vai a “supoñer que nas Pontes se instale unha alternativa enerxética de futuro, sen emisións de CO2 e con capacidade de subministro moderno para toda a industria galega. Vai haber dúas plantas en Galicia e, outra vez se repite o modelo enerxético de Meirama-As Pontes como vectores da alternativa enerxética no país. Trátase, por tanto, dunha moi boa nova que moi pronto veremos concretada sobre o terreo”
Ao termo deste reunión de traballo, o alcalde das Pontes e a Secretaria de Estado de Enerxía participaron nun encontro co tecido empresarial local no que se reafirmou o compromiso do goberno de España co municipio e déronse a coñecer algunhas das liñas e proxectos nos que se traballa o goberno para aproveitar a gran oportunidade que representa a transición enerxética para As Pontes e súa contorna.