A vilalbesa Julia Cabarcos fai historia e logra o seu pase ao Mr. Olympia
A vilalbesa Julia Cabarcos escribiu unha nova páxina na historia do culturismo galego ao conseguir a súa clasificación para o Mr. Olympia, o campionato máis importante e recoñecido desta disciplina a nivel internacional. A deportista, de 41 anos, será a primeira galega en competir neste escenario de elite, que se celebrará en Las Vegas entre o 24 e o 27 de setembro.
O logro chega tras unha intensa traxectoria deportiva e despois de dar o salto ao circuíto profesional da NPC. Cabarcos, que o pasado ano se proclamou campioa de España na categoría amateur tras abandonar a IFBB, conseguiu a súa clasificación para o Olympia na categoría Women Physique ao impoñerse na súa primeira proba profesional disputada en Alacante.
Co billete para Las Vegas xa asegurado, Cabarcos afronta agora as próximas citas competitivas cunha maior tranquilidade. Antes do Mr. Olympia participará en probas internacionais en Portugal e nos Estados Unidos, continuando unha tempada que xa quedou marcada polo seu histórico éxito.
A deportista destaca tamén o apoio recibido por parte do seu adestrador e parella, Arturo Castañeda, dúas veces campión do mundo, unha figura fundamental no seu percorrido deportivo e na preparación para os retos que ten por diante.
A súa clasificación supón un fito para o deporte galego e confirma o crecemento dunha deportista que, a base de constancia e dedicación, conseguiu abrirse paso entre a elite internacional do culturismo.