A Xunta autoriza con condicións a ampliación dunha explotación de vacún de leite en Friol
A Consellería de Medio Ambiente e Cambio Climático emitiu un informe de impacto ambiental favorable, aínda que condicionado, para a ampliación dunha explotación de vacún de leite situada no lugar de Bidueiro, na parroquia de Santo Mamede de Nodar, no concello de Friol.
A resolución conclúe que o proxecto non terá efectos adversos significativos sobre o medio ambiente sempre que se cumpran as condicións recollidas tanto no informe ambiental como na documentación presentada polo promotor e no programa de vixilancia ambiental.
A actuación permitirá incrementar a capacidade da explotación ata as 382 prazas para gando vacún de leite. Para iso prevese a construción dunha corte para xatas, un silo, unha esterqueira e un almacén de forraxe nunha superficie de 22.659 metros cadrados.
O proxecto foi sometido ao procedemento de avaliación de impacto ambiental simplificada, durante o cal a documentación permaneceu en exposición pública sen recibir alegacións. Ademais, a Xunta solicitou informes a nove organismos e entidades, cuxas consideracións foron incorporadas como condicionantes da autorización ambiental.
Entre as medidas establecidas figuran requisitos relacionados coa protección da atmosfera, o control do ruído e dos olores, a prevención da contaminación do solo e das augas, a xestión dos residuos e as actuacións fronte a posibles accidentes ou catástrofes.
A resolución lembra tamén que a autorización ambiental non substitúe o resto de permisos e licenzas que sexan necesarios para executar a ampliación. Así mesmo, antes de que remate a vida útil das instalacións, a empresa deberá presentar un plan coas actuacións previstas para o eventual desmantelamento da explotación.