A Xunta habilita en Lugo 154 puntos de vacinación para a campaña antigripal
![Seco, Balseiro e Ares durante a presentación da campaña deste 2017.](https://terrachaxa.com/wp-content/uploads/2017/10/Seco-Balseiro-e-Ares-durante-a-presentación-da-campaña-deste-2017..jpg)
A Consellería de Sanidade inicia este luns 23 de outubro a campaña anual de vacinación fronte a gripe, que se prolongará durante as próximas dez semanas, ata o seu remate o 29 de decembro.
Como cada ano o obxectivo desta iniciativa é minimizar o impacto da gripe na saúde da poboación lucense mediante a vacinación, tentando diminuír o número de casos e a gravidade das complicacións derivadas de padecela.
O delegado territorial da Xunta en Lugo, José Manuel Balseiro, acompañado do xerente da estrutura de xestión integrada provincial, Ramón Ares, e da xefa territorial da Consellería de Sanidade, Begoña Seco, explicaron en rolda de prensa os pormenores dunha campaña que aspira a incrementar os datos de poboación protexida.
Así por exemplo, indicaron que a provincia de Lugo contará con 154 puntos de vacinación repartidos ao longo de todo o territorio: desde os centros de saúde, aos hospitais da rede Sergas, centros sanitarios privados, residencias da 3ª idade e outros centros con residentes susceptibles de beneficiarse desta vacinación, como poden ser os penitenciarios ou os que acollen a persoas con discapacidade, entre outros.
Amais ao igual que o ano pasado, a Consellería de Sanidade conta cun portal web específico -http://gripe.sergas.gal- con información técnica e de xestión para profesionais sanitarios e con aspectos prácticos para a cidadanía.
Poboación diana
A campaña de vacinación fronte a Gripe 2017 diríxese a todas as persoas con 60 ou máis anos e ás persoas de 6 meses a 59 anos que pertenzan a algún grupo de risco. Aquí estarían incluídas ás persoas con enfermidades crónicas cardiovasculares ou respiratorias; persoas institucionalizadas con procesos crónicos; persoas con enfermidades metabólicas crónicas (diabetes) ou inmunodeficiencias; os nenos e adolescentes -a partir de 6 meses- con tratamentos prolongados de aspirina; persoas con obesidade mórbida; e mulleres embarazadas.
Tamén se inclúen na poboación diana os grupos que poden transmitir a gripe a outras persoas de alto risco -como traballadores de centros sanitarios ou residencias- así como persoas que desenvolven traballos esenciais para a comunidade, como policías, bombeiros ou traballadores dos servizos de emerxencias.
Obxectivos e loxística
A campaña de vacinación durará dez semanas, polo que insisten, hai tempo suficiente para facela progresivamente. Neste senso, lémbrase á poboación que os vacinados en calquera momento da campaña estarán protexidos cando chegue a onda epidémica. En calquera caso, no conxunto da provincia máis de 10.467 persoas xa teñen solicitada a súa cita na actual campaña
Para incrementar as coberturas entre a poboación, a Consellería de Sanidade establecerá axendas de citación especial para a vacinación nos centros de saúde de Atención Primaria. E a partires da cuarta semana de campaña, os profesionais de Enfermería de Atención Primaria promocionarán a vacinación mediante un consello telefónico dirixido á poboación entre 65 e 74 anos dos seus respectivos cupos.
O Goberno galego destina para este fin un orzamento de 1.956.240 euros, cos que a Xunta adquiriu 560.000 doses para esta campaña autonómica. Destas 250.000 son de vacina reforzada, destinadas a persoas ingresadas en residencias da terceira idade e para o resto de persoas maiores de 75 anos, e as 310.000 doses restantes son vacinas antigripais convencionais, destinadas á poboación de calquera idade, a partir dos 6 meses de vida-.
Resumo da campaña 2016
Como xa vén sendo habitual, a provincia de Lugo, despois da de Ourense, foi a que acadou unha maior taxa de vacinación:
En termos globais, en 2016 o 59,87 % dos maiores de 65 anos na nosa provincia recibiron a vacina, o que confirma a tendencia positiva, xa que esta porcentaxe se incrementou en dous puntos con respecto ás cifras do ano 2015, cando se vacinou o 57,87% da poboación deste grupo de idade.
As coberturas foron máis elevadas nos maiores de 75 anos. Neste grupo de idade, acadouse o obxectivo marcado xa que a cobertura superou o 65%.
Pola súa banda a cobertura de vacinación en menores de 60 anos incrementouse con respecto á tempada anterior, pasando do 23,09 ao 25,30%, tamén dous puntos superior.
O incremento máis significativo na ratio de cobertura vacinal, tivo lugar entre os traballadores de centros sanitarios e hospitais (persoal médico e de enfermería) xa que pasou do 22,41% ao 32,18% na última campaña, o que supón dez puntos máis.