A XXIII Festa da Malla de Castro de Rei celebrará tres xornadas para reivindicar as tradicións do campo
Castro de Rei acollerá ao longo do mes de agosto unha nova edición da Festa da Malla, unha celebración que alcanza a súa vixésimo terceira edición e que volverá poñer en valor o patrimonio etnográfico e as tradicións ligadas ao traballo no campo. A programación desenvolverase en tres xornadas diferenciadas, dedicadas á sega, á meda e á malla, co obxectivo de recrear todo o proceso tradicional da recollida do cereal.
A primeira cita terá lugar o sábado 1 de agosto coa celebración da sega. A xornada comezará ás 9.00 horas coa saída desde diante do bar Azúmara cara á finca onde, media hora máis tarde, dará comezo a sega tradicional.
A segunda xornada celebrarase o domingo 23 de agosto no Campo da Feira de Castro de Rei. A meda iniciarase ás 11.00 horas e estará acompañada dun mercado e obradoiros de artesanía a partir das 12.00 horas. A programación completarase ás 13.00 horas coa actuación musical do grupo Toxo Queimado.
A festa culminará o domingo 30 de agosto coa tradicional malla, que dará comezo ás 10.00 horas tamén no Campo da Feira. A partir das 14.00 horas celebrarase un xantar popular amenizado polo Dúo D' Caché.
O menú estará composto por empanada, cachola, chourizo, sardiñas, marmelo, queixo, pan, bebida e café. O prezo da tarxeta será de 20 euros para as persoas adultas e de 10 euros para nenos e nenas de ata 12 anos.
A organización lembra que o número de prazas para o xantar é limitado e recomenda adquirir as tarxetas coa maior antelación posible. Estas poderán mercarse entre o 3 e o 27 de agosto no Supermercado Claudio Grueira, en Germán Naval Lage e na Librería Maduca.
A Festa da Malla consolídase así como unha das citas etnográficas máis destacadas da comarca, reunindo cada ano a veciñanza e visitantes arredor dunha celebración que mantén vivas as tradicións agrícolas e o legado cultural do rural galego.