Abadín remata a renovación do alumeado público con tecnoloxía LED
O Concello de Abadín vén de rematar as obras de renovación das luminarias do alumeado público mediante a instalación de tecnoloxía LED, unha actuación destinada a mellorar a eficiencia enerxética, reducir o consumo eléctrico e modernizar as infraestruturas municipais.
Os traballos desenvolvéronse en distintos puntos do municipio, concretamente na rúa Camiño Real, na estrada de Fanoi, na praza do Campo da Feira, na rúa Calvo Sotelo, na avenida de Galicia, na urbanización das Pedreiras, na rúa Real e na rúa da Fonte. As intervencións tamén chegaron á praza de Gontán, á praza do Campo da Feira desta localidade e á estrada que comunica Labrada con Gontán.
A actuación contou cun orzamento de 77.688,05 euros e foi financiada a través do Fondo de Compensación Ambiental da Xunta de Galicia. A empresa Instalaciones Valdés foi a encargada de executar os traballos.
A substitución das antigas luminarias por outras de tecnoloxía LED permitirá reducir o gasto enerxético e os custos asociados ao servizo, ao tempo que contribuirá a unha xestión máis eficiente e sostible dos recursos públicos.
Con esta intervención, o Concello busca modernizar as infraestruturas municipais, mellorar a iluminación das rúas e dos espazos públicos e avanzar cara a un modelo de municipio máis sostible, cun uso máis eficiente dos recursos públicos.