Abre o prazo extraordinario para solicitar as axudas para a escolarización nas Pontes
O Concello das Pontes abre hoxe, luns, o prazo para a tramitación das solicitudes da axuda ás familias para a escolarización dos seus fillos/as da convocatoria extraordinaria de setembro. O prazo para formalizar as solicitudes remata o 30 de setembro de 2024.
Esta convocatoria vai dirixida ás familias con fillos e/ou fillas empadroados/as no Concello das Pontes, que por obrigación, tiveran que formalizar a matrícula no seu centro, neste mes setembro.
Estas achegas están destinadas a atender os gastos de adquisición de libros, material escolar, material informático e material para o conservatorio do alumnado de Educación Infantil (1º e 2º ciclo), Educación Primaria, Educación Secundaria Obrigatoria (ESO), bacharelato, ciclos formativos (FP) e estudios no Conservatorio de Música.
No caso do alumnado de Educación Infantil, de 0 a 3 anos, a axuda poderá alcanzar os 30 euros. Para Educación Infantil, de 3 a 6 anos, a contía elévase a 100 euros, ao igual que para Educación Primaria e Secundaria. Os ciclos Formativos e o Bacharelato subvencionaranse con ata 140 euros e o alumnado matriculado en FP básica recibirá axudas de 80 euros mentres que o alumnado de grao elemental do Conservatorio recibirá unha achega de 40 euros e a axuda para o alumnado de grao superior ascenderá a 60 euros.
Para solicitar estas achegas é necesario figurar no padrón das Pontes, ter uns ingresos anuais que non superen os 22.500 euros (no caso das familias numerosas o umbral incrementarase en 2.500 euros a partir do terceiro fillo), certificado de matrícula do centro de estudos, no caso de estudos de BAC, FP Básica ou Ciclos Formativos e Conservatorio Profesional de Música así como estar ao corrente coas obrigas fiscais da Axencia Tributaria, Seguridade Social e Concello das Pontes.
Trala resolución de concesión da axuda económica, as contías serán abonadas mediante a entrega dun vale. Deste xeito, a persoa beneficiaria deberá acudir ás oficinas de Servizos Sociais do Concello para retirar o vale da axuda concedida. O prazo para presentar as facturas finalizará o día 15 de decembro de 2024.
As solicitudes, así como a documentación esixida, poderán presentarse a través da sede electrónica municipal ou no rexistro xeral do Concello (con cita previa chamando aos teléfonos 667 129 389/667 129 380) en horario de 08:30 a 14:30 horas.