Acruga leva mañá á poxa de Pedrafita cinco xovencas preñadas da Granxa Gayoso Castro
O recinto feiral de Pedrafita do Cebreiro acollerá mañá domingo unha das últimas poxas do ano, na que se poderá poxar por cinco xovencas preñadas, co obxectivo de lograr a adxudicación de todos os animais, ademais de manter os bos resultados acadados durante toda a tempada de poxas.
A poxa comezará ás 12.00 da mañá, aínda que desde as 11 os criadores e criadoras poderán retirar a tarxeta acreditativa que lles permitirá participar nesta nova poxa. Nesta ocasión poderase poxar por cinco xovencas preñadas, procedentes do centro de recría da Granxa Gayoso Castro, dependente da Deputación de Lugo. Estas reses teñen entre 19 e 25 meses de idade e están preñadas de entre dous meses e medio e catro meses.
Como sempre, a poxa contará con varios factores que contribúen a obter bos resultados neste tipo de poxas. Por unha banda, destacan as boas características destes animais e as súas excelentes calidades morfolóxicas, produtoras, reprodutivas e morfolóxicas, avaladas por unhas xenealoxías nas que figuran touros como Rufino AG, Penedo Ag ou Trisco AG. Outro importante aliciente é a axuda á compra, de 200 euros por exemplar, da man de Caixa Rural.
Esta é unha das últimas poxas do ano, á espera da celebración da poxa nacional de Adai, o vindeiro mes de outubro.