Aitor Fornos volve gañar e reforza a súa candidatura ao título galego de Slalom
Aitor Fornos continúa pisando forte no Campionato Xunta de Galicia de Slalom. O piloto das Somozas conseguiu este pasado sábado a súa segunda vitoria da tempada ao impoñerse no Slalom de Rianxo, quinta proba puntuable do certame autonómico.
Fornos marcou un tempo de 1:23.7 e conseguiu unha axustada vitoria fronte ao vixente campión, Iván Picallo, ao que aventaxou en apenas seis décimas. A igualdade entre ambos volveu quedar patente nunha proba na que calquera pequeno erro podía cambiar as posicións de cabeza.
O podio completouno Pablo Castro, compañeiro de Fornos en As Pontes Motorsport e gañador da proba inaugural do campionato, disputada precisamente nas Pontes. Manuel Cabado e Francisco Rodríguez completaron as cinco primeiras posicións da clasificación xeral.
Entre os debutantes, o mellor resultado foi para David Rodríguez, que rematou na sétima posición da xeral.
Fornos mantén o pulso polo campionato
A vitoria de Rianxo supón un novo impulso para o piloto das Somozas na súa loita polo título autonómico. Fornos xa conseguira o seu primeiro triunfo do curso no Slalom de Sarria e, tras a cuarta proba disputada en Moeche, atopábase á fronte da clasificación xeral cunha vantaxe reducida sobre Pablo Castro e Iván Picallo.
O calendario sufriu, ademais, unha modificación importante para a recta final da tempada. A cancelación do Slalom das Somozas deixou o campionato cunha última proba, que se disputará en Fene durante o mes de novembro.
Deste xeito, Fornos afrontará a recta decisiva da tempada coa posibilidade de pelexar polo título galego nunha última cita especialmente relevante para o automobilismo da comarca de Ferrolterra.