Alicia Morado, veciña de Codesido, celebra os seus 100 anos en Vilalba
Alicia Morado, veciña da parroquia de Codesido, celebrou os seus 100 anos de vida nunha xornada especial na que recibiu a visita da alcaldesa de Vilalba, Marta Rouco, e da concelleira Paula Vigo.
Ambas as representantes municipais achegáronse á súa casa para felicitala polo seu centenario e compartir con ela e coa súa familia esta data tan sinalada.
Con esta celebración, Alicia súmase ao grupo de máis dunha vintena de persoas centenarias que residen no municipio de Vilalba. Trátase de veciños e veciñas que representan toda unha vida de esforzo, traballo, experiencias e memoria.
Desde o Concello destacan que estas visitas, iniciadas en 2024, teñen como obxectivo recoñecer e poñer en valor as persoas maiores do municipio, escoitar as súas historias e agradecerlles todo o que achegaron ás súas familias e á sociedade vilalbesa.