Sociedade

As actuacións dos dúos Venus, Boreal e Fénix, das orquestras Alianza e Fania Blanco Show e a tradicional procesión en honra á Nosa Señora centrarán unha programación pensada para todos os públicos

Xermade xa ten todo preparado para celebrar as festas na honra á Nosa Señora, que se desenvolverán os días 7, 8 e 9 cun programa no que se combinan os actos relixiosos, a música en directo, a gastronomía e as actividades tradicionais.

Os festexos comezarán o venres cunha gran verbena amenizada polos dúos Venus e Boreal. A partir das 21.30 horas, os asistentes poderán gozar ademais de petiscos gratuítos ofrecidos polos distintos postos instalados no recinto festivo, con liscos, churrasco, xamón cocido e outros produtos ata fin de existencias.

A xornada do sábado arrancará ás 12.45 horas cunha pasarrúas a cargo da Asociación Cultural Axóuxere de Roupar. Ás 13.30 horas celebrarase a misa solemne e a procesión na honra á patroa, seguida da sesión vermú coa orquestra Alianza. Pola noite terá lugar unha nova verbena protagonizada polas orquestras Alianza e Fania Blanco Show.

O domingo 9 continuará a programación relixiosa coa misa solemne das 13.30 horas e a posterior procesión, acompañada nesta ocasión pola Banda Municipal de Guitiriz. A continuación celebrarase unha sesión vermú prolongada co grupo Fénix, que tamén será o encargado de pechar as festas coa actuación da noite.

A celebración conta coa colaboración do Concello de Xermade, da Vicepresidencia da Deputación de Lugo e de numerosos establecementos comerciais e empresas da comarca, que contribúen á organización dunhas festas que cada ano reúnen a centos de veciños e visitantes e que constitúen unha das citas máis destacadas do calendario festivo do municipio.