As Pontes acolle tres obras de teatro afeccionado en setembro
O Auditorio Municipal Cine Alovi das Pontes volverá ser escenario da actividade cultural durante o mes de setembro cunha programación dedicada ao teatro afeccionado. O Concello das Pontes aposta por recuperar a actividade teatral tras o verán cunha proposta que reunirá tres representacións os sábados 12, 19 e 26, todas elas ás 20.00 horas e con entrada gratuíta.
A programación dará comezo o sábado 12 coa estrea de Paixón de Bulevares, a nova proposta do grupo de Teatro Amador Q Mais Ten Teatro. A representación servirá para inaugurar o ciclo de setembro e achegar novamente o público ao teatro local.
A segunda cita será o sábado 19, tamén ás 20.00 horas, coa representación de Tartufo, de Molière, a cargo do Teatro Kumen de Langreo. A función forma parte de CITA, o Ciclo de Teatro Amador organizado pola Federación de Teatro Amador de Galicia (FeteaGal), en colaboración con distintas entidades locais e Escenamateur.
A obra de Molière presenta a historia de Tartufo, un falso devoto que consegue gañarse a confianza de Orgón facéndose pasar por un home virtuoso e relixioso. Aproveitándose da súa credulidade, tratará de facerse cos seus bens e poñer en perigo a súa familia.
O ciclo pecharase o sábado 26 coa representación de Dinero Negro, da Asociación Teatral Tatrüm, outra das propostas incluídas en CITA. Trátase dunha divertida comedia do dramaturgo británico Ray Cooney.
A historia arrinca cando Carlos García atopa dez millóns de euros nun maletín ao saír do traballo. Ao chegar á casa, a súa muller, Ana, agárdao cunha cea de aniversario. Carlos, porén, ten outros plans: pretende marchar canto antes, dando así comezo a unha sucesión de situacións marcadas polo humor e os enredos propios da comedia.
Con esta programación, o Concello das Pontes pretende promover o teatro afeccionado e achegar a cultura á veciñanza, ofrecendo tres propostas diferentes ao longo do mes.