As Pontes acollerá en xuño tres grandes torneos de fútbol base con equipos de diferentes categorías
O Club Deportivo As Pontes organizará durante o mes de xuño unha intensa programación de fútbol base coa celebración de tres competicións que reunirán a numerosos equipos e xogadores novos nas instalacións deportivas da localidade.
Os días 6 e 7 de xuño disputarase o IX Torneo de Fútbol 8 Vila de As Pontes, dirixido ás categorías prebenxamín, benxamín e alevín. Ademais, tamén haberá unha convivencia para a categoría biberón, promovendo así a participación dos máis pequenos nun ambiente deportivo e de convivencia.
Nesas mesmas datas celebrarase tamén o II Torneo Infantil Feminino de Fútbol 11 Vila de As Pontes, unha cita que continúa apostando polo impulso do fútbol feminino de base e pola promoción do deporte entre as novas xeracións de xogadoras.
A programación continuará os días 13 e 14 de xuño coa disputa da IV As Pontes Cup de Fútbol 11, destinada ás categorías infantil e cadete. O torneo reunirá a diferentes equipos nunha competición que xa se consolidou dentro do calendario deportivo da comarca.
Desde a organización destacan que estas citas deportivas servirán para fomentar os valores do compañeirismo, a convivencia e o deporte base, ademais de converter As Pontes nun punto de encontro para clubs, familias e afeccionados ao fútbol durante dúas fins de semana consecutivas.