As Pontes celebra este sábado unha gran gala a beneficio da AECC
O salón de plenos do Concello das Pontes acolleu hoxe a presentación oficial da Gala Solidaria As Pontes, unha iniciativa organizada a beneficio da Asociación Española Contra o Cancro (AECC), que se celebrará o vindeiro sábado, 7 de novembro, ás 19:00 horas, no Auditorio Municipal Cine Alovi.
No acto participaron a presidenta da xunta local da Asociación Española Contra o Cancro, Loli Prieto, e Servando Iglesias e Antonio Villanueva, representantes da directiva da Rondalla Vila das Pontes. Tamén estiveron presentes as concelleiras de Benestar Social, Tania Pardo, e de Cultura, Lorena Tenreiro, que quixeron amosar o seu apoio a esta proposta solidaria.
Durante a presentación púxose en valor o labor que desenvolve a Asociación Española Contra o Cancro, tanto no acompañamento e apoio ás persoas diagnosticadas e ás súas familias como na promoción da investigación e da prevención da enfermidade. Así mesmo, destacouse a importancia da colaboración entre institucións, asociacións e colectivos locais para impulsar iniciativas que contribúan a esta causa.
A gala contará coas actuacións da Rondalla Vila das Pontes, No Cómbaro e Arrivederci, e estará amenizada por Juan Anillo. Unha proposta cultural e solidaria que reunirá sobre o escenario diferentes formacións e artistas vinculados ao municipio, que colaboran desinteresadamente con esta causa.
A concelleira de Benestar Social, Tania Pardo, agradeceu o traballo que desenvolve a Asociación Española Contra o Cancro, destacando o seu compromiso coas persoas diagnosticadas e coas súas familias, así como o importante labor de acompañamento, prevención e apoio que realiza. Tamén puxo en valor a colaboración entre institucións, asociacións e colectivos para impulsar iniciativas solidarias coma esta.
Pola súa banda, Servando Iglesias, en representación da Rondalla Vila das Pontes e como un dos promotores da gala, explicou os detalles desta cita solidaria e destacou a implicación da Rondalla na organización e impulso do evento. Así mesmo, agradeceu a colaboración dos grupos e artistas participantes e animou á veciñanza a asistir e apoiar esta iniciativa, que nace co obxectivo de contribuír ao labor da AECC e sumar esforzos na loita contra o cancro.
A concelleira de Cultura, Lorena Tenreiro, sinalou que a cultura tamén é unha ferramenta para construír comunidade e amosar o compromiso social, destacando que esta gala é un exemplo de como o talento local e a participación dos colectivos do municipio poden poñerse ao servizo dunha causa solidaria.
Pola súa banda, a presidenta da xunta local da AECC, Loli Prieto, agradeceu a colaboración do Concello, da Rondalla Vila das Pontes, dos promotores da gala, dos artistas participantes, das entidades colaboradoras e de todas as persoas que fan posible a celebración deste evento. Tamén animou á veciñanza a participar e contribuír a unha iniciativa que busca transformar a solidariedade en apoio real ás persoas que conviven co cancro.
As entradas teñen un prezo de 5 euros e poden adquirirse en Óptica Baamonde e Calzados Saavedra. Tamén estarán dispoñibles na billeteira desde dúas horas antes do comezo do espectáculo.
As persoas que non poidan asistir, pero queiran colaborar coa causa, poderán realizar as súas achegas a través da Fila 0, na conta bancaria indicada pola organización: ES45 2080 0000 7330 4001 8073.
Desde o Concello das Pontes anímase a toda a veciñanza a participar nesta cita, gozar dunha tarde de música e, sobre todo, contribuír a unha causa que precisa do compromiso e da colaboración de toda a sociedade.