As Pontes destina preto de 187.000 euros para as entidades culturais
O Concello das Pontes destinará 186.660 euros ás entidades culturais do municipio no ano 2026, segundo as bases publicadas no Boletín Oficial da Provincia da Coruña. Do importe total, 170.660 euros corresponden ao financiamento de actividades culturais e 16.000 euros a infraestruturas e equipamento.
As axudas están dirixidas a entidades privadas sen ánimo de lucro con finalidade cultural, legalmente constituídas, con domicilio fiscal nas Pontes e que desenvolvan a súa actividade no municipio ou en ámbitos de interese para a localidade. Ademais, deberán estar inscritas no Rexistro de Asociacións de Galicia, no Rexistro de Asociacións do Concello das Pontes e no Rexistro de Fundacións de Galicia.
A convocatoria ten como finalidade apoiar o traballo das entidades culturais, favorecer a participación da cidadanía na vida cultural e contribuír ao desenvolvemento dos seus proxectos, incorporando tamén entre os seus obxectivos o fomento da igualdade de xénero e a promoción do uso da lingua galega.
Os fondos poderán destinarse á programación cultural e a gastos vinculados ao seu desenvolvemento, como persoal, seguros, transporte asociado a visitas culturais, publicidade e comunicación, son e iluminación, materiais, cursos, charlas e obradoiros, así como determinados gastos de funcionamento.
Tamén se contempla o financiamento de equipamentos, mobiliario, reformas e materiais de carácter técnico e artístico, e de vestiario directamente relacionado coas actividades subvencionadas, sempre que se xustifique a súa necesidade e utilización.
A concesión realizarase en réxime de concorrencia competitiva. Entre os criterios de valoración teranse en conta a calidade e o contido dos proxectos, a súa adecuación ás liñas estratéxicas da área municipal de Cultura, a formación e a posta en valor do patrimonio cultural e natural das Pontes, así como o interese e impacto sociocultural das propostas.
Tamén se valorarán aspectos como o carácter multidisciplinar dos proxectos, o número de persoas asociadas e beneficiarias, o emprego vinculado ás actividades e o nivel de financiamento propio.
No caso dos investimentos e equipamentos, valorarase o seu interese e a súa contribución ao desenvolvemento da actividade cultural das entidades, así como a incorporación de melloras ambientais e tecnolóxicas.
As entidades interesadas dispoñen ata o 13 de outubro para presentar as súas solicitudes. A tramitación deberá realizarse exclusivamente por vía telemática, a través da Sede Electrónica do Concello das Pontes, mediante o modelo oficial.
Con esta convocatoria, o Concello reforza o apoio ao tecido asociativo cultural e á actividade que desenvolven as entidades locais, facilitando recursos para impulsar a programación, a formación, a divulgación e posta en valor do patrimonio e a mellora dos medios necesarios para o desenvolvemento dos seus proxectos.