As Pontes organiza un obradoiro de cosmética natural con caléndula para o coidado da pel

A Asociación de Amas de Casa das Pontes organiza o vindeiro martes 24 de novembro o obradoiro Caléndula: natureza que coida a nosa pel, unha actividade destinada a descubrir os beneficios desta planta e aprender a aproveitar as súas propiedades naturais para o coidado persoal.
A iniciativa desenvolverase de 17.00 a 19.00 horas na sede das Amas de Casa, situada no Poboado do Barreiro, e estará impartida por María Freijomil.
Durante o obradoiro, as persoas participantes aprenderán a transformar as flores de caléndula en diferentes produtos naturais de cosmética, concretamente un oleato, un ungüento e un bálsamo labial.
Ademais, ao rematar a actividade, cada participante levará unha mostra de cada unha das elaboracións realizadas. Tamén terá a oportunidade de adquirir produtos naturais feitos con caléndula, unha proposta que pode converterse nunha alternativa para agasallar este Nadal con pequenos detalles de esencia natural.
O prezo da actividade será de 20 euros para as socias da entidade e de 25 euros para as persoas non socias.
As persoas interesadas en participar ou recibir máis información poden chamar aos teléfonos 667 748 462 e 659 058 025.
Con esta proposta, a Asociación de Amas de Casa das Pontes busca achegar á veciñanza os segredos da cosmética natural e fomentar o coidado da pel a través de elaboracións artesanais.