As Pontes reunirá a elite do BTT galego nunha fin de semana de competición e deporte base
As Pontes converterase esta fin de semana nun dos principais escenarios do ciclismo de montaña en Galicia coa celebración dunha nova edición das probas organizadas polo Club Ciclista Terras do Eume. Durante dous días, a vila acollerá competicións dirixidas tanto ás categorías de alto nivel como ás promesas do deporte base.
A programación arrancará o sábado coa disputa do IV XCO Vila de As Pontes, unha cita que dará comezo ás 15.00 horas e que será puntuable para o Campionato de Galicia BTT Rally 2026. A competición reunirá corredores e corredoras das categorías Elite, Sub-23, Júnior, Cadete, Infantil e Máster, converténdose nunha das probas destacadas do calendario autonómico da especialidade.
A actividade continuará o domingo coa celebración do IV MiniBTT Vila de As Pontes, que comezará ás 10.00 horas. Nesta xornada serán protagonistas os máis novos, coa participación de deportistas das categorías Promesa, Benxamín, Principiante e Alevín.
O evento consolidase como unha das grandes citas deportivas do municipio e un importante punto de encontro para afeccionados e participantes do ciclismo de montaña, combinando competición, deporte ao aire libre e promoción dos valores asociados á actividade física.
Desde a organización e o Concello animan á veciñanza e aos amantes do BTT a achegarse ás probas para desfrutar dunha fin de semana na que As Pontes volverá situarse como referencia do ciclismo de montaña galego.