Avanzan na construción do miradoiro do Pedregal de Irimia
![pedregal de Irimia_meira](https://terrachaxa.com/wp-content/uploads/2021/03/pedregal-de-Irimia_meira.jpg)
José Antonio Quiroga, presidente da Confederación Hidrográfica do Miño-Sil, CHMS, organismo autónomo dependente do Ministerio para a Transición Ecolóxica e o Reto Demográfico, e o alcalde de Meira, Antonio de Dios, rubricaron o Convenio de colaboración que posibilitará a execución do proxecto de Centro de Interpretación do Alto Miño en O Pedregal de Irimia.
O investimento total necesario estímase en 220.000 euros, a sufragar pola CHMS, pola súa banda, o Concello de Meira achegará os terreos necesarios para a execución do proxecto.
O proxecto
O Pedregal de Irimia é un enclave hidrográfico natural situado na ladeira oeste da Serra de Meira, a 3 quilómetros da capitalidade do municipio. “Un lugar emblemático a valorizar para o goce de veciños e visitantes” explicou Quiroga.
As actuacións consisten na construción dunha edificación de planta baixa, cunha superficie útil aproximada de 150 m2, sobreelevada sobre a rasante do terreo, con materiais da zona, para dedicar a miradoiro, situada nas inmediacións do Pedregal, así como as actuacións complementarias que permitan achegarse ao pedregal de forma segura para escoitar o son da auga baixo as pedras; ademais, construirase un aparcamento para vehículos.
“Con esta iniciativa pretendemos complementar o centro de interpretación do Alto Miño, que construiremos en Fonmiñá, todo iso co interese de potenciar os valores ambientais e paisajisticos da cabeceira do Miño” incidiu o presidente.
O presente convenio ten por obxecto determinar as condicións que rexerán o financiamento, redacción do proxecto, posta ao dispor dos terreos, execución e o réxime da posterior entrega para a xestión, o mantemento e a conservación das actuacións.
![concello de meira chms alcalde](https://terrachaxa.com/wp-content/uploads/thumbs/2021/08/concello-de-meira-chms-alcalde-1-200x104.jpg)