Begonte organiza unha excursión a Cambados e Combarro con viaxe en catamarán e mariscada a bordo
O Concello de Begonte vén de anunciar unha excursión a Cambados e Combarro que terá lugar o vindeiro 29 de xullo. A actividade permitirá ás persoas participantes gozar dunha xornada de lecer na comarca do Salnés, combinando patrimonio, gastronomía e tradición.
O programa inclúe a asistencia á Festa do Albariño de Cambados, onde os asistentes poderán visitar as casetas da celebración e participar nas actividades previstas arredor dun dos eventos enolóxicos máis destacados de Galicia. A excursión completarase cunha visita á vila mariñeira de Combarro, coñecida polos seus hórreos e pola súa singular paisaxe costeira.
Un dos principais atractivos da xornada será a viaxe en catamarán, durante a cal se ofrecerá unha mariscada a bordo. O prezo da actividade será de 55 euros para as persoas empadroadas no municipio e de 65 euros para as non empadroadas.
A saída está prevista para as 08.30 horas e as prazas son limitadas, cun máximo de cen participantes que serán admitidos por rigorosa orde de inscrición ata o 24 de xullo.
Para formalizar a inscrición será necesario cubrir a solicitude correspondente, presentar o DNI, a tarxeta sanitaria e o xustificante de pagamento. O Concello facilitará o número de conta para realizar o ingreso no momento de tramitar a reserva.
Desde o goberno local animan á veciñanza a participar nesta proposta, que combina mar, boa gastronomía, viño e ambiente festivo nunha das citas máis recoñecidas do verán galego.