Begonte reclama máis recursos para o CEIP Virxe do Corpiño mentres o BNG acusa a Xunta de incumprir as ratios
A situación do CEIP Plurilingüe Virxe do Corpiño de Begonte chegou este martes ao pleno da Deputación de Lugo e tamén ao Parlamento galego, no marco das reclamacións para aumentar os recursos docentes do centro. A corporación provincial aprobou unha moción do grupo socialista para solicitar á Xunta que destine máis mestres ao colexio, unha iniciativa que contou co voto en contra dos populares.
O acordo reclama tamén que se teña en conta o cómputo específico do alumnado con necesidades educativas especiais para garantir o cumprimento das ratios establecidas pola normativa autonómica, así como un reforzo suficiente de Pedagoxía Terapéutica para asegurar unha atención adecuada ao alumnado con necesidades específicas de apoio educativo tanto en Educación Infantil como en Primaria.
A petición da Deputación coincide coa reclamación formulada este martes pola deputada do BNG Olalla Rodil, que esixiu á Xunta unha terceira unidade de Educación Infantil no CEIP Virxe do Corpiño para o curso 2026/2027. Segundo explicou a formación nacionalista, o centro conta con 27 alumnos matriculados neste ciclo, unha cifra que ascende a 29 para efectos do cómputo das ratios ao incluír alumnado con necesidades educativas específicas.
A Lei 5/2024 establece que, cando se agrupa alumnado de diferentes niveis do segundo ciclo de Educación Infantil nunha mesma unidade, o número non pode superar os 14 estudantes, e fixa ademais regras específicas para o cómputo do alumnado con determinadas discapacidades ou graos de dependencia.
Rodil denunciou que a Consellería de Educación mantén dúas aulas mixtas no centro e considerou que a decisión de non autorizar unha terceira unidade contravén a normativa. A deputada afirmou ademais que as familias levan mobilizándose desde o inicio do curso, o 9 de setembro, para reclamar o cumprimento da lexislación e acusou o Goberno galego de desatender as súas demandas.
A parlamentaria do BNG criticou tamén as supostas advertencias recibidas pola dirección do centro e polas familias durante as mobilizacións e cuestionou que a resposta da Xunta non fose incrementar os recursos. Desde a formación nacionalista sosteñen que a situación prexudica especialmente o alumnado con necesidades educativas especiais.
A controversia prodúcese mentres a comunidade educativa de Begonte continúa reclamando máis persoal. Nunha mobilización celebrada o pasado 24 de setembro, representantes das familias do CEIP Virxe do Corpiño reclamaron o cumprimento da normativa e máis recursos humanos para o centro. Segundo a ANPA, ao colexio corresponderíanlle tres aulas de Infantil e unha mestra de apoio, fronte ás dúas unidades que mantén actualmente.
Así, a reclamación pola terceira unidade de Infantil e polo reforzo do persoal docente mantense aberta en distintas institucións, mentres as familias e os grupos da oposición reclaman á Xunta unha resposta ás necesidades de escolarización do CEIP Virxe do Corpiño.