BTTeando por Guitiriz regresa cunha ruta de montaña de 20 quilómetros por Roca
A bicicleta de montaña volverá percorrer os camiños de Guitiriz o domingo 18 de outubro coa recuperación do programa 'BTTeando por Guitiriz', que retoma a súa actividade despois do parón estival. A primeira saída da nova tempada será a Ruta de Roca, unha proposta para gozar do deporte ao aire libre e coñecer a contorna natural do municipio.
O itinerario desenvolverase pola parroquia de Roca e terá unha lonxitude de 20 quilómetros, cun desnivel acumulado de 300 metros. A marcha está pensada para participantes de distintos niveis, cun ritmo tranquilo que permita completar o percorrido en grupo e descubrir os espazos naturais e o patrimonio da zona.
A iniciativa está organizada polo Concello de Guitiriz e polo club ciclista local Btteiros Cova da Serpe, que promoven estas saídas para achegar a bicicleta de montaña a persoas afeccionadas á natureza e ao ciclismo.
O prazo para anotarse rematará o xoves 15 de outubro. As persoas interesadas poden formalizar a inscrición a través do código QR incluído no cartel da actividade ou no propio Concello de Guitiriz.