Cabreiros remata este sábado as Letras Galegas nas Xornadas Interxeracionais Rurais
A parroquia de Cabreiros, no concello de Xermade, foi escenario ao longo do mes de maio dunha nova edición das Xornadas Interxeracionais Rurais Aprendendo cos nosos maiores, unha iniciativa organizada pola Asociación de Veciños de Cabreiros en colaboración coa Universidade de Santiago de Compostela (USC). O programa inclúe actividades culturais, educativas e participativas que buscan poñer en valor o coñecemento tradicional e fomentar o intercambio entre xeracións.
A programación deu comezo o día 9 de maio e rematará este sábado cunha sesión dedicada á historia local baixo o título Xermade na historia, que incluirá a presentación do cuarto libro dos premios Xermade na Historia. Durante esta xornada daranse a coñecer diversos traballos premiados en edicións recentes, centrados en aspectos demográficos, sociais e culturais do municipio. O peche oficial das xornadas terá lugar ás 13:00 horas.
Esta iniciativa consolídase como un espazo de encontro e aprendizaxe compartida, no que se reivindica o valor da memoria colectiva e o papel das persoas maiores como transmisoras de saberes no ámbito rural.