Catro campións do mundo protagonizan o Rallyshow das Pontes cunha fin de semana de motor e exhibición
Catro lendas dos rallyes reuniranse esta fin de semana para participar nunha das grandes citas do automobilismo galego. Stig Blomqvist, Miki Biasion, Petter Solberg e Luis Moya, todos eles campións do mundo, serán os principais reclamos da segunda edición da Festa do Motor da Deputación da Coruña, que combinará competición, exhibicións, actividades familiares, gastronomía e música durante os días 15 e 16 de agosto.
O evento terá como escenario o circuíto das Pontes, onde a actividade comezará xa o sábado pola mañá e se prolongará durante toda a fin de semana. A entrada será gratuíta e, ademais do espectáculo na pista, os asistentes poderán achegarse ás figuras internacionais a través dunha Fan Zone, participar en diferentes propostas e desfrutar dunha ampla zona de restauración.
A traxectoria dos catro convidados percorre varias décadas da historia dos rallyes. Stig Blomqvist foi campión do mundo en 1984 co mítico Audi Quattro, mentres que Miki Biasion conquistou dous títulos consecutivos, en 1988 e 1989, ao volante do Lancia Delta Integrale. Petter Solberg acadou o Mundial de Rallyes en 2003 con Subaru e tamén foi campión mundial de rallycross. Pola súa banda, o galego Luis Moya proclamouse bicampión do mundo como copiloto de Carlos Sainz nos anos 1990 e 1992.
A primeira xornada estará dedicada a quentar motores antes do gran espectáculo do domingo. O sábado, ás 10:00 horas, terá lugar a recepción dos pilotos e, media hora despois, os campións e os participantes profesionais realizarán voltas de exhibición e recoñecemento do circuíto cos seus vehículos. Ás 12:00 horas presentarase oficialmente o Rallyshow e, desde as 13:00 horas, os afeccionados seleccionados para a experiencia TRS poderán completar voltas nun Renault Clio RSR Rally2 acompañados por un instrutor profesional.
Pola tarde chegarán os adestramentos libres dos pilotos que competirán ao día seguinte, mentres o recinto manterá diferentes actividades para o público. Haberá unha exposición de vehículos históricos, clásicos, deportivos e de competición, simuladores profesionais de rally e propostas específicas para as familias.
Un dos puntos de maior interese será a Fan Zone, deseñada para achegar as lendas dos rallyes aos afeccionados. O público terá a oportunidade de fotografarse cos pilotos e conseguir os seus autógrafos. O espazo incluirá tamén un photocall, merchandising e un globo aerostático que, se as condicións meteorolóxicas o permiten, ofrecerá unha perspectiva diferente das Pontes.
Os máis pequenos tamén contarán con actividades propias, entre elas un circuíto de educación viaria con karts a pedais, percorridos sinalizados e propostas relacionadas coa seguridade viaria e a mobilidade responsable.
O Rallyshow concentra o espectáculo o domingo
A segunda xornada terá como protagonista o Rallyshow Deputación da Coruña, que celebrará o domingo 16 de agosto a súa segunda edición. As instalacións abrirán ao público ás 09:00 horas e a competición combinará as diferentes mangas con exhibicións de Carcross, Drift e outras disciplinas do motor.
Despois dos adestramentos libres e da manga clasificatoria da mañá, pola tarde chegarán as eliminatorias decisivas. Os oitavos e cuartos de final darán paso ás semifinais, á loita polo terceiro e cuarto posto e á gran final, prevista para as 17:45 horas. A entrega de trofeos será ás 18:00 horas e, ás 18:30, os pilotos convidados volverán á pista para unha última manga de exhibición.
A actividade non se limitará ao circuíto. Durante os dous días permanecerá aberta unha zona de restauración con churrasco, polbo, bocadillos e foodtrucks, para que o público poida pasar a xornada completa no recinto.
O broche final chegará coa música. Sés actuará ás 19:00 horas do domingo, poñendo o punto final a unha fin de semana que pretende reunir nun mesmo espazo automobilismo, espectáculo, gastronomía e propostas de lecer para públicos de todas as idades.