Catrocentos nenos e nenas cantarán á Terra Chá en Vilalba na décima edición de “No bico un cantar”
Vilalba converterase este venres 5 de xuño no epicentro da música e da literatura galega coa celebración da décima edición de “No bico un cantar”, unha iniciativa impulsada polo Consello da Cultura Galega en colaboración coa Xunta de Galicia e o Concello de Vilalba. Preto de 400 nenos e nenas chegados de diferentes puntos do país participarán nun concerto colectivo que renderá homenaxe á Terra Chá e aos seus grandes referentes literarios.
A presentación do evento tivo lugar este luns coa participación da presidenta do Consello da Cultura Galega, Rosario Álvarez, quen destacou que o proxecto “pon música á tradición literaria galega para divulgala entre o alumnado dos conservatorios e centros de ensino musical”. Pola súa banda, o director xeral de Cultura, Anxo Lorenzo, definiu a iniciativa como “un proxecto moi querido” froito dun importante esforzo colectivo.
Tamén o subdirector xeral de Aprendizaxe Permanente, Ensinanzas Artísticas, Idiomas e Deportivas, Rubén Vázquez, puxo en valor a colaboración institucional para achegar a cultura galega á infancia e mocidade. A alcaldesa de Vilalba, Marta Rouco, salientou a implicación do Concello nun evento que reunirá centos de participantes na vila chairega, mentres que o director musical do concerto, Maximino Zumalave, asegurou que se trata “dunha xornada especial que permite facer música con xente moi nova”.
O recital celebrarase ás 17.30 horas na escalinata da Praza de Santa María, aínda que a programación comezará xa pola mañá coa chegada do alumnado e os ensaios previos. O concerto contará coa participación do sexteto de metais Hércules Brass e de estudantes dos conservatorios profesionais da Coruña, Ferrol, Lugo, Ourense, Pontevedra, Santiago e Vilalba, ademais das escolas municipais de música de Mondoñedo, Ribadeo e Xove, o coro infantil da OSG e a Escolanía da Catedral de Santiago.
O programa musical xirará arredor da Terra Chá e da súa contribución á cultura galega, con pezas inspiradas en autores como Manuel María, Darío Xohán Cabana, Xosé Crecente Vega ou Rosalía de Castro. Entre os momentos máis destacados figura a estrea absoluta de “Dicir do namorado”, unha composición de Paulino Pereiro creada sobre un poema de Xosé Crecente Vega.
A iniciativa “No bico un cantar” leva máis dunha década percorrendo Galicia con propostas que combinan música e literatura, dedicando cada edición a diferentes figuras e tradicións da cultura galega. Tras homenaxear a Rosalía, Curros Enríquez, Castelao ou a Xeración Nós, nesta ocasión será a Terra Chá a protagonista dun encontro que busca achegar o patrimonio cultural galego ás novas xeracións.