Cospeito abre o luns o prazo para anotarse ás escolas deportivas
O Concello de Cospeito pon en marcha unha nova edición das escolas deportivas municipais. O prazo de inscrición abres este luns e finaliza o 2 de outubro.
As disciplinas ofertadas son as mesmas de anos anteriores, aínda que as máis demandadas en pasadas edicións foron fútbol sala, natación, ximnasia rítmica, tenis e patinaxe.
No caso do fútbol sala (que se impartirá no pavillón municipal da Feira do Monte e no ximnasio do colexio os martes e xoves), haberá que indicar a categoría na que se inscribe e no de natación, (na piscina da Pastoriza), a quenda: martes ou mércores de 16.30 a 17.15 horas.
Ximnasia rítmica será os venres no ximnasio do colexio da Feira do Monte e patinaxe, os luns e os mércores no pavillón da Feira do Monte.
Finalmente, a de tenis será no pavillón de Feira do Monte e os horarios estableceranse en dúas quendas, de 18.30 a 19.30 e de 19.30 a 20.30 horas.
As actividades terán un preo de 15 euros por neno para a primeira e de 12 para a segunda e seguintes. A piscina é de 20 euros.