Cospeito vive con éxito a XXXV Feira da Maquinaria Usada e Artesanía e a XIX Feira das Antigüidades
Cospeito está a vivir con gran afluencia de público a XXXV Feira da Maquinaria Usada e Artesanía e a XIX Feira das Antigüidades, dúas citas xa consolidadas no calendario festivo e comercial da provincia de Lugo. O evento combina exposición, actividade económica e programación cultural arredor do mundo rural e das tradicións galegas.
O delegado territorial da Xunta en Lugo, Javier Arias, destacou a importancia desta feira, que definiu como unha cita “que reúne o mellor do campo e da tradición galega”, ao tempo que puxo en valor o seu papel dinamizador pola repercusión económica, social e cultural que xera en toda a comarca.
Arias salientou tamén o labor desenvolvido polo Concello de Cospeito para manter e reforzar algunhas das convocatorias máis destacadas da primavera na provincia. Nese sentido, lembrou a celebración da Moexmu entre os días 9 e 12 de abril, esta Feira das Antigüidades e Artesanía, así como a Festa da Filloa, prevista en Muimenta para o próximo 1 de maio.
A xornada do sábado 25 concentra boa parte das actividades programadas, con exposición de antigüidades, maquinaria e a visita institucional ao recinto feiral, ademais dunha destacada presenza de público durante toda a xornada.
A programación continuará o domingo 26 coa apertura do recinto ás 9:00 horas. O peche da feira e a clausura oficial están previstos para as 20:30 horas, poñendo remate a tres días de intensa actividade vinculada ao sector.
De maneira paralela, o programa inclúe tamén as Actividades Culturais coa celebración da V Festa da Música. Durante o sábado haberá pasarrúas ao longo do día a cargo de distintas agrupacións musicais, así como cantos de taberna nos bares durante a tarde e a noite. O domingo, a partir das 13:30 horas, continuarán as actuacións musicais para completar unha oferta deseñada para animar o ambiente festivo e atraer visitantes.