Convocada unha manifestación para esixir a apertura do centro de saúde de Castro de Rei
O Bloque Nacionalista Galego en Castro de Rei convoca unha concentración para a reactivación dos centros de saúde do concello e a recuperación do seu persoal facultativo. Será este sábado, 18 de setembro, ás 12:00 horas diante do centro de saúde da localidade de Castro Ribeiras de Lea.
A concelleira e voceira do BNG en Castro de Rei, Digna Lagarón, explicou que ”é indencente contar cun só facultativo para as máis de 5000 veciñas e veciños, cómpre a reactivación inmediata do centro de saúde de Castro de Rei, o cal leva pechado ano e medio, e a recuperación de persoal nos dous centros que temos”.
Neste sentido, a nacionalista destacou que a falta de facultativos nos dous centros de saúde está “acarreando problemas graves na saúde das persoas, como a falta de medicamentos ou, simplemente, a observación dun facultativo para calquera doencia” declarou Digna Lagarón.
Por isto, o BNG anima a participar á veciñanza de Castro de Rei este sábado nesta concentración na que “ ten que se nos escoitar, xa que a Xunta de Galiza nin o goberno municipal está a facer nada para solucionar esta situación, por isto animamos ás veciñas e veciños a participar para que se cumpra un servizo sanitario digno” subliñou a súa voceira.
