Sanidade

Segundo indicaron fontes municipais, a profesional que obtivo a praza tomará posesión do seu posto nos vindeiros días, incorporándose de xeito efectivo á atención sanitaria no municipio

A praza de médico de familia do centro de saúde de Riotorto quedou cuberta no marco da Oferta Pública de Emprego (OPE) do Sergas correspondente ao ano 2025. Así o confirmou o propio Servizo Galego de Saúde, que detallou que a vacante foi adxudicada dentro do proceso selectivo desta convocatoria.

Segundo indicaron fontes municipais, a profesional que obtivo a praza tomará posesión do seu posto nos vindeiros días, incorporándose de xeito efectivo á atención sanitaria no municipio. A súa chegada permitirá reforzar a atención primaria na zona, mellorar a continuidade asistencial e responder con maior eficacia ás necesidades da veciñanza.

Tanto desde o Concello de Riotorto como desde a área sanitaria valorouse de forma moi positiva esta incorporación, xa que se trataba dunha demanda reiterada pola poboación nos últimos meses. "A cobertura da praza supón un avance na mellora dos servizos sanitarios do municipio e contribúe a garantir unha atención máis estable e próxima para os usuarios do centro de saúde", explican desde o Concello.