Educando en Familia estrea un servizo de acompañamento psicopedagóxico no novo curso
Educando en Familia iniciará o 9 de setembro un novo curso coa incorporación dun Servizo de Acompañamento Psicopedagóxico ás Familias, unha proposta coa que pretende ampliar a atención que presta e ofrecer unha resposta máis individualizada ante as necesidades que poidan xurdir durante o desenvolvemento das crianzas.
A entidade acumula máis de 30 anos de experiencia no traballo coas familias, especialmente durante os primeiros anos de vida. O programa está implantado en diferentes concellos da Mariña e da Terra Chá e desenvolve boa parte das súas actividades en centros educativos, onde proporciona gratuitamente orientación, prevención, formación e acompañamento.
ATENCIÓN INDIVIDUAL
O novo recurso permitirá ás familias solicitar apoio cando aparezan dúbidas ou sinais de alerta relacionados co desenvolvemento, a aprendizaxe, a adaptación ao ámbito escolar ou o benestar emocional dos nenos e nenas.
O servizo ofrecerá detección temperá de posibles dificultades, valoración e orientación psicopedagóxica e asesoramento ante necesidades específicas de apoio educativo. Entre elas poden atoparse dificultades relacionadas coa linguaxe ou a aprendizaxe, TEA, TDAH, altas capacidades ou outras situacións que se manifesten ao longo do desenvolvemento.
Ademais de orientar sobre as estratexias e recursos máis axeitados para cada caso, as profesionais poderán facilitar, cando resulte necesario, a coordinación cos centros educativos e con outros servizos ou especialistas. O obxectivo é favorecer unha intervención temperá e abordar cada situación desde diferentes ámbitos.
Desde Educando en Familia inciden en que o programa non está pensado unicamente para momentos nos que exista unha dificultade concreta. As familias poden recorrer tamén a este recurso para resolver dúbidas, recibir orientación ou contar con acompañamento nas distintas etapas da crianza.
A actividade irá retomándose progresivamente a partir do 9 de setembro nos centros e localidades nos que está implantado o programa. Co novo servizo psicopedagóxico, a entidade reforza a súa aposta pola prevención, a detección temperá e o benestar e desenvolvemento integral da infancia.