Entregados os premios da campaña Merca no teu Comercio para Rábade, Outeiro de Rei e Begonte
O Campo da Feira de Rábade acolleu a entrega dos premios correspondentes á campaña Merca no teu comercio, que se desenvolveu entre o 1 e o 15 de xullo nos municipios de Rábade, Outeiro de Rei e Begonte.
Entre os consumidores que mercaron nos establecementos destas localidades durante a iniciativa, na que se rexistraron 1.757 tíckets, sorteouse un total de 1.000 euros, repartidos en 20 tarxetas prepago de 50 euros. Os gañadores recibiron esta mañá o seu premio, que deberán empregar en novas compras no comercio de proximidade local.
Merca no teu comercio ten premio é unha campaña de promoción e dinamización das vendas do comercio de proximidade dos municipios rurais organizada pola Federación de Comercio de Lugo, a Federación Galega de Comercio e a Xunta de Galicia, neste caso coa colaboración da Asociación de Comerciantes de Rábade.
Na entrega de premios participaron representantes das entidades organizadoras; entre eles, José María Seijas, presidente da Federación Galega de Comercio e da Federación de Comercio de Lugo; Dolores Lage, presidenta da Asociación de Comerciantes de Rábade; Remedios González, alcaldesa de Rábade; así como Suevia Arraña, subdirectora da oficina de ABANCA en Rábade, entre outros.