Felicitan ao Concello de Castro de Rei pola reactivación de licencias urbanísticas
A conselleira de Medio Ambiente, Territorio e Vivenda, Ángeles Vázquez, felicitou ao alcalde de Castro de Rei, Francisco Balado, por ser quen de reactivar a concesión de licencias urbanísticas no municipio grazas á aprobación do Plan xeral de ordenación municipal (PXOM).
Ángeles Vázquez e Francisco Balado mantiveron esta semana unha reunión, na que o rexedor valorou que contar cunha ferramenta urbanística actualizada e acorde á lei actual é unha garantía para permitir un crecemento ordenado e sostible.
Castro de Rei converteuse, en xullo de 2020, no último concello da provincia de Lugo en aprobar un PXOM, o primeiro co que conta este municipio de pouco máis de 5.000 habitantes que anteriormente se rexía polo Plan básico autonómico.
A conselleira e o alcalde coincidiron en que abordar a redacción dun plan xeral non é unha tarefa fácil, pero si necesaria para garantir a evolución e o crecemento urbanístico dun municipio. “Hoxe, co desbloqueo das licencias urbanísticas, visualízanse os primeiros froitos de contar cun PXOM nun concello como Castro de Rei”, manifestou a conselleira.
Por último, Ángeles Vázquez indicoulle que a protección e ordenación do territorio é unha tarefa que se debe executar cada día, e que, en ocasións, require de ferramentas máis concretas. Nese sentido, trasladoulle o compromiso da Dirección Xeral de Ordenación do Territorio e Urbanismo para buscar solucións que permitan protexer os valores do seu casco histórico.