Festas de Vilalba: As grandes citas musicais das patronais
O sábado 5 de setembro será o día máis musical das festas de San Ramón e Santa María de Vilalba. Ademais do pasacalles e a sesión vermú amenizada polo dúo Estrellas, pola noite, a partir das 22.30 horas na Praza da Constitución, contarase coa presenza do dúo Marcos Peón e DJ Frisco. Co seu espectáculo Yo lataba en EGB farán soar os grandes éxitos que marcaron a toda unha xeración.
O prato forte chegará da man do grupo A Toda Pastilla, un tributo a Estopa que non deixará indiferente a ninguén.
A Toda Pastilla é unha banda tributo dedicada aos irmáns Muñoz que busca recrear con fidelidade e paixón os grandes éxitos do coñecido dúo catalán. Formada por músicos profesionais, a agrupación ofrece un espectáculo que combina a esencia, o estilo e a enerxía que caracterizan a Estopa, facendo un percorrido polas diferentes etapas da súa traxectoria musical.
O proxecto está formado por José Gayo á batería, Ignacio Carasa ao baixo, Miguel Fernández ao teclado, Facundo Virasoro á guitarra, Antonio Miguel ‘Rocky’ Guevara á guitarra española e nos coros, e Diego Teruel ‘El Bombo’ como voz principal. Xuntos reproducen o son e a personalidade musical de Estopa, coidando especialmente a posta en escena e a calidade do son para ofrecer unha experiencia próxima á dunha actuación da banda orixinal.
Estopa deixou unha pegada profunda na música española grazas á súa particular mestura de rumba, flamenco e pop. Cancións como La Raja de tu Falda, Vino Tinto ou Como Camarón forman parte do imaxinario musical de varias xeracións e contribuíron a converter o dúo nun auténtico fenómeno cultural.
Desde o respecto e a profesionalidade, A Toda Pastilla propón así unha homenaxe á obra dos irmáns Muñoz, percorrendo as diferentes etapas da carreira de Estopa a través dun repertorio cargado dos seus grandes éxitos. O obxectivo é facer desfrutar tanto aos seguidores do dúo catalán como ao público xeral, que medrou e desfrutou destas cancións ao longo dos anos.
FESTIVAL DE BANDAS
Previo a estes concertos, celebrarase o tradicional Festival de Bandas de Pepe Guntín, un clásico nas festas. As bandas participantes son a Banda de Música da Comarca de Sarria, a Banda de Música de Siero e a Banda de Música de Vilalba, unha agrupación musical creada en 1991 a partir da escola de música fundada polo Concello en 1987 co propósito fundamental de promover e divulgar a música de banda. Entre os seus finos máis relevantes figuran as súas aparicións na Televisión de Galicia, na Radio Galega e en Televisión Española en Galicia. Ademais, a formación conta con dous traballos gravados, editados nos anos 1995 e 2001, este último publicado para conmemorar o seu X Aniversario.
Actuaron ademais, o luns 31 de agosto na Praza da Rúa da Pravia. Unha cita inesquecible para os amantes da música tradicional galega e da localidade de Vilalba.